“Sülh Aylığı” çərçivəsində maarifləndirici təlim keçirilib

Azərbaycan Respublikasının İnsan Hüquqları üzrə Müvəkkili (Ombudsman) tərəfindən 21 avqust – 21 sentyabr tarixlərinin ölkədə “Sülh Aylığı” elan edilməsi ilə əlaqədar Azərbaycan Respublikası Müdafiə Sənayesi Nazirliyinin əməkdaşları üçün “İnsan hüquqları ilə sülh arasında mövcud olan qarşılıqlı və ayrılmaz əlaqə” mövzusunda maarifləndirici təlim keçirilib.

21 sentyabr – Beynəlxalq Sülh Günü münasibətilə təşkil edilən tədbirin əsas məqsədi sülh və insan hüquqları arasında qarşılıqlı əlaqəyə dair məlumatlılığın artırılmasıdır.

Təlim zamanı insan ləyaqətinin qorunması, hüquq və azadlıqların təmin edilməsi, qanunun aliliyinə və dövlət institutlarına ictimai etimadın gücləndirilməsi, sülhün və insan hüquqlarının qarşılıqlı əlaqəsinin cəmiyyətdə sabitlik və anlaşma mühitinin formalaşmasında rolu barədə ətraflı məlumat verilib. Tədbirdə, həmçinin bu istiqamətdə dövlət orqanları ilə yanaşı, məhkəmələrin, vətəndaş cəmiyyəti institutlarının, medianın və İnsan Hüquqları üzrə Müvəkkilin (Ombudsmanın) fəaliyyətinin əhəmiyyəti vurğulanıb.

Bildirilib ki, qarşılıqlı hörmət və etimad mühitinin gücləndirilməsi, dialoq və anlaşma imkanlarının genişləndirilməsi davamlı sülhün və insan hüquqları mədəniyyətinin formalaşdırılmasına mühüm töhfə verir.