MSN-in üzgüçülük üzrə yığma komandası Respublika spartakiadasının qalibi olub

Azərbaycan Respublikası Müdafiə Sənayesi Nazirliyinin (MSN) üzgüçülük üzrə yığma komandası Azərbaycan Həmkarlar İttifaqları Konfederasiyası tərəfindən keçirilən 18 Oktyabr - Müstəqilliyin Bərpası Gününə həsr olunmuş XXII Respublika spartakiadasında (11 oktyabr - 23 noyabr) birinci yerə layiq görülüb.

AZAL İdman Kompleksinin üzgüçülük hovuzunda baş tutan yarışda Milli Aviasiya Akademiyası, "Bakı Metropoliteni" Qapalı Səhmdar Cəmiyyəti, “Baku Steel Company” şirkəti və MSN-in yığma komandaları iştirak ediblər.

İdmançılar 50 metr məsafəyə sərbəst üsulla üzmə növündə mübarizə aparıblar.

MSN-in yığma komandasının üzvləri bütün rəqiblərini geridə qoyaraq yarışın qalibi olublar.

Nəzərinizə çatdıraq ki, spartakiadada uğurla iştirak edən Müdafiə Sənayesi Nazirliyinin yığma komandaları voleybol üzrə yarışda 1-ci, futbol və stolüstü tennis üzrə yarışlarda 3-cü, kəndir dartma üzrə yarışda isə 2-ci yerdə qərarlaşıblar.

MSN-nin komandaları spartakiada çərçivəsində nərd, dama, şahmat və güllə atıcılığı yarışlarında da mübarizə aparacaqlar.

Qeyd edək ki, Azərbaycan Həmkarlar İttifaqları Konfederasiyası oktyabrın 11-dən noyabrın 23-dək “Zenit” İdman Cəmiyyətinin xidməti sahəsinə daxil olan aviasiya, elektroenergetika və elektrotexnika, müdafiə sənayesi, avtomobil nəqliyyatı və yol təsərrüfatı, metal işçiləri, “Baku Steel Company” və metropoliten sahələri üzrə yığma komandalar arasında 18 Oktyabr - Müstəqilliyin Bərpası Gününə həsr olunmuş XXII Respublika spartakiadası keçirir.

Paylaşmaq üçün linki kopyala:

Yazını paylaş

Baxış sayı:

778