Aprelin 23-də Müdafiə Sənayesi Nazirliyi (MSN) və Bakı Mühəndislik Universitetinin (BMU) birgə təşkilatçılığı ilə “Azərbaycanın müasir müdafiə sənayesi” mövzusunda tələbələrlə görüş keçirilib. BMU-nun akt zalında təşkil edilən tədbirdə müdafiə sənayesi nazirinin müşaviri Arif Babayev, MSN-in şöbə müdiri, Əməkdar mühəndis Məmmədsaleh Əliyev, Nazirliyin məsul əməkdaşı, Vətən Müharibəsi Qəhrəmanı Qəzənfər Ağayev, BMU-nun prorektoru Bayram Hüseynzadə, İctimaiyyətlə əlaqələr şöbəsinin müdiri Elman Babayev, universitetin professor-müəllim heyəti və tələbələr iştirak ediblər.

Öncə müasir müstəqil Azərbaycan dövlətinin qurucusu, Ulu Öndər Heydər Əliyevin və torpaqlarımızın azadlığı uğrunda canlarından keçən Vətən övladlarının xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Sonra ölkəmizin müdafiə sənayesindən bəhs edən videoçarx nümayiş etdirilib.

Tədbirdə çıxış edənlər vurğulayıblar ki, Ulu Öndər Heydər Əliyevin Azərbaycana rəhbərlik etdiyi dövrlərdə Respublika iqtisadiyyatının digər sahələri ilə yanaşı, müdafiə sənayesi sahəsində də əvəzsiz işlər görülüb. Siyasi, inzibati və ideoloji əngəllərə baxmayaraq, MSN-in əsasını təşkil edən və ölkəmizin müxtəlif şəhərlərində yerləşən spesifik təyinatlı müəssisələrin yaradılmasına nail olunub.

Qeyd edilib ki, Ulu Öndər Heydər Əliyevin layiqli davamçısı Azərbaycan Respublikasının Prezidenti cənab İlham Əliyevin ölkəmizin müdafiə sənayesinin yaradılmasında və inkişafındakı misilsiz xidmətləri, Onun rəhbərliyi ilə həyata keçirilən uğurlu islahatlar sayəsində dünyada Azərbaycan silahının nüfuzu günbəgün yüksəlir.

Diqqətə çatdırılıb ki, ordunun daha da qüdrətlənməsi və döyüş hazırlığı müdafiə sənayesinin inkişafı ilə birbaşa əlaqəlidir. Bu gün Azərbaycan artıq rəqabətədavamlı, müasir standartlara cavab verən məhsullar istehsal etmək qabiliyyətindədir. Hazırlanan hərbi təyinatlı məhsulların çeşidi artıb, Milli Ordunun ən müasir silah növləri ilə təchiz edilməsi üçün zəruri addımlar atılıb. Bunun nəticəsidir ki, MSN-in istehsal etdiyi silahlar istər 44 günlük Vətən müharibəsində, istərsə də Azərbaycan Respublikasının konstitusiya quruluşunun bərpa edilməsi məqsədilə Qarabağ iqtisadi rayonunda yüksək peşəkarlıqla aparılan lokal xarakterli antiterror tədbirləri zamanı düşmənə öz gücünü və qüdrətini əməli döyüş şəraitində bir daha göstərib.

Bildirilib ki, Prezident İlham Əliyevin xüsusi tapşırıqlarına əsasən düzgün aparılmış işlər nəticəsində nazirliyin müəssisələrində istehsal edilmiş ümumi məhsul həcminin çoxunu ixraca yönəltmək mümkün olub.

MSN tərəfindən gənclərə intellektual səviyyələrini artırmaları, innovativ mühəndislik üzrə aparıcı qüvvə kimi formalaşmaları, nəzəri biliklərin praktiki təcrübə ilə vəhdəti əsasında xüsusi bacarıqlarını daha da yüksəltmələri məqsədilə hərtərəfli şərait yaradılır.

Çıxışlardan sonra Nazirliyin əməkdaşları tələbələri maraqlandıran sualları cavablandırıblar.

Sonda BMU-nun rektoru Yaqub Piriyev MSN-in nümayəndə heyətini universitetin Mexanika Mühəndisliyi Laboratoriyaları, həmçinin tələbələrin hazırladığı startaplarla tanış edərək ətraflı məlumatlar verib.