Müdafiə Sənayesi Nazirliyində “Zenit” İdman Cəmiyyətinin xidmət sahəsinə daxil olan müəssisə və təşkilatların XV Respublika Spartakiadasında fərqlənən Müdafiə Sənayesi İşçiləri Həmkarlar İttifaqı Respublika Komitəsinin nazirliyin işçilərindən təşkil olunmuş komandalarının üzvləri ilə görüş keçirildi.

Tədbiri açan Müdafiə Sənayesi İşçiləri Həmkarlar İttifaqı Respublika Komitəsinin sədri Röfət Müfid-Zadə müdafiə sənayesi naziri Yavər Camalovun təbriklərini komanda üzvlərinə çatdırdı.

Röfət Müfid-Zadə bildirdi ki, respublikada bədən tərbiyəsi və idmanın inkişafına köməkliyin göstərilməsi və Həmkarlar İttifaqı üzvlərinin sağlamlığının möhkəmləndirilməsi məqsədilə 2012-ci ildə “Zenit” İdman Cəmiyyətinə üzv təşkilatların birgə qərarına əsasən xidmət sahəsinə daxil olan müəssisə və təşkilatların XV Respublika Spartakiadası keçirilmişdir.

Keçirilən Spartakiadaya Müdafiə Sənayesi İşçiləri Həmkarlar İttifaqı Respublika Komitəsinin nazirliyin işçilərindən təşkil olunmuş komandaları da qatılmış və layiqli yerlər tutmuşlar. Müdafiə Sənayesi Nazirliyi işçilərinin komanda və fərdi halda qatıldıqları yarışlarda voleybol, dama və güllə atıcılığı üzrə I yeri, nərd və kəndirdartma üzrə II yeri, şahmat üzrə III yeri, həmçinin fərdi yarışlarda daşqaldırma üzrə bir nəfər I, üç nəfər II və bir nəfər III yerləri, armrestlinq üzrə iki nəfər I, üç nəfər III yeri tutmuşlar. Nazirlik ümumi komanda hesabında II yer tutmuşdur. Buna görə də komandalar “Zenit” İdman Cəmiyyətinin Respublika Şurasının diplomları və kuboku ilə təltif olunmuşlar.

Müdafiə Sənayesi Nazirliyi fəaliyyətə başladığı gündən etibarən nazirliyin əməkdaşlarının sağlamlıqlarının möhkəmləndirilməsi və asudə vaxtlarının səmərəli keçirilməsi məqsədi ilə nazirliyin müəssisələrində yüksək səviyyədə şərait yaradıldığını vurğulayan Röfət Müfid-Zadə buna görə nazirliyin rəhbərliyinə öz təşəkkürünü bildirdi.

Tədbirin sonunda komandaların formalaşdırılmasında, məşqlərin, yarışların keçirilməsində əməyi olan şəxslərə və yarışlarda fərqlənən komanda üzvlərinə pul mükafatları verildi.