Aprelin 12-də Müdafiə Sənayesi Nazirliyi Milli Aerokosmik Agentliyinin əməkdaşları “Beynəlxalq Aviasiya və Kosmonavtika” günü münasibətilə Fəxri Xiyabanda agentliyin yaradıcılarından biri olan akademik Tofiq İsmayılovun məzarını ziyarət etdilər, qəbirüstü abidəsi önünə əklil və gül dəstələri qoydular.

Sonra agentliyin baş direktorunun I müavini, texnika elmləri doktoru Tofiq Süleymanov akademik Tofiq İsmayılovun peşəkar fəaliyyəti, MAKA üçün gördüyü işlər barədə mərasim iştirakçılarına geniş məlumat verdi. Onunla çiyin-çiyinə çalışmış MAKA-nın əməkdaşları – Təbii Ehtiyatların Kosmik Tədqiqi  İnstitutunun direktoru, texnika elmləri doktoru Fəxrəddin Ağayev, Ekologiya İnstitutunun direktoru, fizika-riyaziyyat elmləri namizədi Xasməmməd Əsədov, şöbə rəisi, texnika elmləri namizədi Möhtəmən Eyniyev, şöbə rəisi, fizika-riyaziyyat elmləri namizədi Bəhram Basqallı və Milli Aviasiya Akademiyasının dosenti, texnika elmləri namizədi Kamal Hüseynov akademik haqqında xoş xatirələrini bölüşdülər.