Avqustun 14-də Azərbaycan Respublikasının müdafiə sənayesi naziri Vüqar Mustafayev və Azərbaycan Respublikasının müdafiə nazirinin müavini – Baş direktor Aqil Qurbanovun rəhbərlik etdiyi nümayəndə heyəti Sumqayıt Texnologiyalar Parkını (STP) ziyarət edib.

Konfrans zalında keçirilən iclasda STP-nin rəhbər şəxsləri tərəfindən istehsal sahələri, görülmüş işlər, gələcək planlar və ixrac uğurları barədə qonaqlara ətraflı məlumat verilib.

Daha sonra STP-nin zavodlarından bir neçəsini ziyarət edən nazirliklərin rəsmiləri müəssisələrdəki şərait, müasir avadanlıqlar, istehsal olunan məhsullar və iş prosesi ilə yaxından tanış olublar.