Ümummilli lider Heydər Əliyevin anadan olmasının 87-ci ildönümü münasibəti ilə Müdafiə Sənayesi Nazirliyinin işçiləri arasında 23 aprel tarixindən başlayaraq keçirilən şahmat, dama və nərd oyunlarından ibarət stolüstü  idman yarışları başa çatdı.

Müdafiə Sənayesi İşçiləri Həmkarlar İttifaqı Respublika Komitəsinin təşkilatçılığı ilə keçirilən yarışlar iki turdan ibarət olmuşdur. Birinci tur 23 aprel - 03 may tarixlərində müəssisədaxili, ikinci tur 4 - 5 may tarixlərində müəssisələr arasında təşkil olunmuşdur. Birinci turun nəticələrinə görə ikinci tura vəsiqə qazanmış iştirakçılardan 15-i  I, II və III yerləri bölüşmüşlər.        

Mayın 11-də Müdafiə Sənayesi Nazirliyinin aparatında yarışlarda qalib olmuş iştirkaçılarla görüş keçirildi. Qaliblərə tutduqları yerlərə müvafiq olaraq Müdafiə Sənayesi İşçilərinin Həmkarlar İttifaqı Respublika Komitəsi  tərəfindən təsis olunmuş diplomlar və pul mükafatları təqdim edildi.