Müdafiə Sənayesi Nazirliyinin müəssisələrində yaradılan və istehsal olunan müdafiə təyinatlı məmulatlar 12-14 dekabr tarixlərində Küveytdə keçirilən  “Körfəz Müdafiə və Aerospeys” sərgisində nümayiş etdirildi. Bununla bağlı müdafiə sənayesi naziri Yavər Camalovun başçılıq etdiyi nümayəndə heyəti bu ölkədə səfərdə oldu.

Üç gün davam edən sərgidə Müdafiə Sənayesi Nazirliyi 97 adda müdafiə təyinatlı məmulat nümayiş etdirdi.

Nümayiş etdirilən atıcı silahlar, döyüş sursatları və  digər məmulatlar sərgiyə qatılan ölkələrin nümayəndələri tərəfindən böyük maraqla qarşılandı. ABŞ, İngiltərə, Fransa, Almaniya, Kanada və digər ölkələrin mütəxəssisləri Müdafiə Sənayesi Nazirliyinin istehsal etdiyi məmulatları yüksək qiymətləndirdilər. 

Sərgi zamanı Müdafiə Sənayesi Nazirliyinin rəhbərliyi ilə Küveytin Müdafiə Nazirliyinin və digər güc qurumlarının rəsmiləri arasında görüşlər keçirildi. Keçirilən görüşlərdə Azərbaycan müdafiə sənayesinin istehsal etdiyi məmulatların Küveytin və digər ərəb ölkələrinin bazarlarına çıxarılmasına dair danışıqlar aparıldı və hərbi təyinatlı məmulatlar üzrə gələcək tenderlərə Müdafiə Sənayesi Nazirliyinin dəvət edilməsi ilə bağlı razılıq əldə olundu.