Azərbaycanda Müdafiə Sənayesi Nazirliyinin xətti ilə hərbi təyinatlı məhsulların buraxılması prosesi uğurla gedir və biz bu sahədə də böyük nailiyyətlərə çata bilmişik
İlham Əliyev
02 Dekabr, 2021 13:35 462

Azərbaycan-Pakistan Hökumətlərarası Birgə Komissiyasının 7-ci iclasının Protokolu imzalanıb

Azərbaycan-Pakistan Hökumətlərarası Birgə Komissiyasının Pakistan İslam Respublikası tərəfindən həmsədri, Pakistanın müdafiə istehsalatı naziri Zobaida Calalın başçılıq etdiyi nümayəndə heyəti noyabrın 29-dan dekabrın 3-dək Azərbaycan-Pakistan Birgə Komissiyasının 7-ci iclası ilə əlaqədar ölkəmizdə rəsmi səfərdədir.

Noyabrın 30-da Azərbaycan Respublikasının Prezidenti cənab İlham Əliyevin qəbulunda olan xanım Zobaida Calalın başçılıq etdiyi nümayəndə heyətinin üzvləri daha sonra Fəxri Xiyabana yollanaraq Azərbaycan xalqının Ümummilli Lideri Heydər Əliyevin məzarı önünə əklil qoyublar. Sonra Şəhidlər Xiyabanını ziyarət edən qonaqlar Vətənimizin ərazi bütövlüyü uğrunda gedən döyüşlərdə canlarından keçmiş şəhidlərimizin əziz xatirəsini dərin hörmət və ehtiramla yad ediblər.

Dekabrın 1-də Marriott Abşeron hotelində keçirilən Azərbaycan-Pakistan Hökumətlərarası Birgə Komissiyasının 7-ci iclasında Komissiyanın Azərbaycan Respublikası tərəfindən həmsədri, müdafiə sənayesi naziri Mədət Quliyev və Pakistan İslam Respublikası tərəfindən həmsədri Zobaida Calal ilk növbədə tədbirə qatılan 23 qurumun səlahiyyətli nümayəndələrini, həmçinin iclasa Pakistandan onlayn qoşulan iştirakçıları və digər qonaqları salamlayıblar.

Açılış nitqi ilə çıxış edən müdafiə sənayesi naziri Mədət Quliyev əsası Ümummilli Lider Heydər Əliyev tərəfindən qoyulmuş və Ulu Öndərin layiqli davamçısı Azərbaycan Respublikasının Prezidenti cənab İlham Əliyevin davam etdirdiyi xalqlarımız və dövlətlərimiz arasındakı əlaqələrdən bəhs edib, dövlət başçımızın Pakistanın Prezidenti Arif Alvi və baş naziri İmran Xan ilə şəxsi dostluq və qardaşlıq münasibətlərinin dövlətlərimiz arasındakı birliyin bugünkü yüksək səviyyəyə çatmasında mühüm rol oynadığını qeyd edib.

Nazir 44 günlük Vətən müharibəsi dövründə Pakistanın Azərbaycanın ədalətli mövqeyinə verdiyi davamlı siyasi-mənəvi dəstəyə və qardaş mövqeyinə görə bir daha minnətdarlığını bildirərək, Azərbaycan xalqının bunu yüksək qiymətləndirdiyini vurğulayıb.

Toplantı çərçivəsində iki ölkə arasında iqtisadi əməkdaşlığın genişlənməsi, ticarət dövriyyəsinin həcminin artırılması, biznes dairələri arasında əlaqələrin səviyyəsinin qaldırılması ilə bağlı gələcək perspektivlər müzakirə olunub, bank, enerji, müdafiə sənayesi, nəqliyyat və rabitə, kosmik fəzadan dinc məqsədlərlə istifadə, kənd təsərrüfatı, gənclər və idman, ədliyyə, elm və təhsil, səhiyyə, qida təhlükəsizliyi sahələri ətrafında geniş fikir mübadiləsi aparılıb. 

Dekabrın 2-də Azərbaycan-Pakistan Birgə Komissiyasının yekun iclası baş tutub.  Tədbirdə çıxış edən müdafiə sənayesi naziri Mədət Quliyev ticarət, enerji, nəqliyyat, turizm, təhsil və hərbi-texniki sahələr də daxil olmaqla əməkdaşlıq münasibətlərinin bütün sahələr üzrə genişləndirilməsinin əhəmiyyətini vurğulayıb və ölkələrimizin həm ikitərəfli müstəvidə, həm də beynəlxalq təşkilatlarda daim bir-birini dəstəklədiklərini xüsusi qeyd edib.

Xoş qəbula və qonaqpərvərliyə görə nazirə minnətdarlığını bildirən xanım Zobaida Cəlal Pakistan və Azərbaycan arasındakı dostluq və qardaşlıq münasibətlərinin dərin tarixi köklərə söykəndiyini vurğulayaraq bu münasibətlərin əbədi və sarsılmaz olacağından əminliyini ifadə edib. Qonaq Azərbaycan-Pakistan Birgə Komissiyasının iclasının da əlaqələrimizin genişləndirilməsinə xidmət edəcəyinə əminliyini bildirib. O, səfərdən məmnunluğunu ifadə edərək Azərbaycan-Pakistan Hökumətlərarası Birgə Komissiyasının 7-ci iclasının əlaqələrimizin möhkəmlənməsi işinə töhfə verəcəyini söyləyib.

Sonda Azərbaycan Respublikası Hökuməti və Pakistan İslam Respublikası Hökuməti arasında Azərbaycan-Pakistan iqtisadi əməkdaşlıq üzrə Hökumətlərarası Birgə Komissiyasının 7-ci iclasının yekununa dair Protokol imzalanıb.